ماہنامہ البلاغ

16۔ ماہنامہ البلاغ اردو

  البلاغ جامعہ دارالعلوم کراچی کے شعبہ نشر واشاعت کی طرف سے اردو زبان میں علمی ، ادبی، تحقیقی اور تاریخی مضامین پر مشتمل یہ ماہنامہ رسالہ گذشتہ ساٹھ سالوں سے مسلسل شائع ہورہا ہے ، یہ رسالہ نہ صرف پاکستان بلکہ بیرونی ممالک میں بھی مقبول ہے ۔ مفتی اعظم پاکستان حضرت مولانا مفتی محمد شفیع صاحب نور اللہ مرقدہ کی آٹھ جلدوں پر مشتمل شہرہ آفاق تفسیر ـ’’معارف القرآن‘‘قسط وار شکل میں البلاغ میں شائع ہوتی رہی ہے ۔

شیخ الاسلام حضرت مولانا مفتی محمد تقی عثمانی صاحب مدظلہم کا مقبول عام ’’آسان ترجمہ قرآن ‘‘ کا کافی حصہ سلسلہ وار شائع ہوتا رہا اور اب حضرت والا کی ہدایت پر ’’آسان تفسیر قرآن‘‘ کی سلسلہ وار اشاعت شروع ہوچکی ہے ۔ اس کے علاوہ حضرت شیخ الاسلام صاحب دامت برکاتہم کی سوانح حیات ’’یادیں‘‘ کی بھی اٹھاون اقساط شائع ہوچکی ہیں۔

نیز اس رسالہ کے مفتی اعظم رحمۃ اللہ علیہ نمبر اور حضرت عارفی رحمۃ اللہ علیہ نمبر اور مولانا سحبان محمود رحمۃ اللہ علیہ نمبر اور مولانا عاشق الٰہی رحمۃ اللہ علیہ نمبر نے بطور خاص علمی دنیا سے خراج تحسین حاصل کرچکے ہیں ۔

17۔ البلاغ انٹرنیشنل (انگریزی)

پچھلے دوسو سالہ برطانوی استعمار کی وجہ سے دنیا کے بڑے حصے پر انگریزی تہذیب و تمدن کی چھاپ ہے اور انگریزی زبان مسلم وغیر مسلم ممالک میں نہ صرف بولی جاتی ہے، بلکہ ہماری شامتِ اعمال کے نتیجے میں اب تک پاکستان میں بھی اس کو تقریباً سرکاری زبان کی حیثیت حاصل ہے۔ یہ بھی اس دور کا المیہ ہے کہ مختلف ممالک کے مسلمانوں کے درمیان رابطہ کا ذریعہ اب عربی کے بجائے انگریزی زبان بن گئی ہے۔ نوتعلیم یافتہ طبقہ ہر طرح کی معلومات کے حصول کے لئے بھی اسی زبان کے ادب اور مطبوعات کی طرف رجوع کرتاہے۔ انگریزی ادب میں اسلام سے متعلق زیادہ تر مواد مغربی مستشرقین کا تیار کردہ ہے، جس میں اسلام کی حقیقی معلومات فراہم کرنے کے بجائے دینِ حنیف کو مکروہ شکل میں پیش کیا گیاہے۔

اس صورت حال کی اصلاح کے لئے مختلف افراد اور اداروں کی طرف سے بحمداللہ مثبت کام ہورہاہے اور جگہ جگہ دینِ حنیف کی حقیقی تعلیمات کو اُجاگر کرنے لئے اب انگریزی زبان میں بھی معتدبہ معلومات دستیاب ہونے لگی ہیں۔

حضرت مولانا مفتی محمد تقی عثمانی صاحب دامت برکاتہم کی زیرنگرانی اور براہِ راست سرپرستی میں انگریزی زبان پڑھنے سمجھنے والوں کے لئے دینی ضروری معلومات پر مشتمل البلاغ انگریزی بھی اسی سلسلہ کی ایک کڑی ہے ، اس کے مفید سلسلوں میں ،معارف القرآن انگریزی (سلسلہ وار تفسیر)، ورلڈود اِن ،تزکیہ نفس سے متعلق مضامین،تاریخی مضامین، حضرت مولانا مفتی محمدتقی عثمانی صاحب کی ’’یادیں‘‘ کا انگریزی ترجمہ ،سفرنامے ، تحقیقی مضامین ، بہتر خاندانی زندگی کے حوالے سے مضامین ۔ نیز بچوں کے لئے سبق آموز قصے شامل ہیں۔

یہ شمارہ انگریزی زبان پڑھنے سمجھنے والوں کے لئے کسی نعمت سے کم نہیں ہے۔

18۔ سہ ماہی البلاغ عربی

مدارس عربیہ اور علوم عربیہ کی ضرورت کے پیش نظر سہ ماہی البلاغ عربی بھی جدید انداز میں متعارف کرایا جاچکا ہے ،یہ رسالہ حضرت مولانامفتی محمد تقی عثمانی صاحب مدظلہم کی زیر نگرانی شائع ہونے والا ایک علمی ، تحقیقی اور ادبی مجلہ ہے، جو علمائے برصغیر خصوصاً اکابر دیوبند اور مشائخ جامعہ دارالعلوم کراچی کے گراں قدر علمی ورثے کو عربی زبان میں پیش کرنے کی خدمت سر انجام دے رہا ہے۔ یہ مجلہ جدید علمی موضوعات کے علاوہ، عربی زبان و ادب کے شستہ ذوق کی آبیاری اور اس کے فروغ میں اہم کردار ادا کررہا ہے ۔ عالمی کانفرنسز میں پیش کیے گئے مشائخِ جامعہ کے علمی و فکری مقالات ومحاضرات بھی البلاغ عربی کی زینت بنتے ہیں۔ مجلہ کی طرف سے اب تک حضرت صدر جامعہ رحمہ اللہ تعالی کی یاد میں’’مفتی اعظم نمبر‘‘ اور’’فلسطین غزہ نمبر‘‘ جیسے خصوصی شمارے شائع کیے جا چکے ہیں، جبکہ’’معارف القرآن‘‘ کا سلسلہ وار عربی ترجمہ بھی جاری ہے۔ کئی علمی رسائل کی تعریب مکمل ہوگئی ہے۔ اللہ تعالیٰ کے فضل سے، مجلہ اندرون ملک کے علاوہ، بیرون ملک قارئین میں بھی مقبول ہو رہا ہے۔

ماہنامہ البلاغ اردو، ماہنامہ البلاغ انگلش، سہ ماہی البلاغ عربی اپنے نام جاری کرانے کے لئے درج ذیل ذرائع سے رابطہ کیا جاسکتا ہے:

فون نمبر 00922135123222

واٹس ایپ نمبر 00923182735670

ای میل ایڈریس monthlyalbalagh@gmail.com

خط و کتابت :ماہنامہ البلاغ ، جامعہ دارالعلوم کراچی، انڈسٹریل ایریا کورنگی کراچی،پوسٹ کوڈ نمبر: 75180