جامعہ دارالعلوم کراچی کے زیر انتظام مساجد

جامعہ دارالعلوم کراچی کورنگی کے احاطے میں واقع جامع مسجد کے علاوہ مزید تین مساجد کا انتظام بھی جامعہ دارالعلوم کراچی کے تحت ہے، ان میں سے ایک ’’محمدی مسجد‘‘ ہے جو دارالعلوم کے قریب ہی صنعتی علاقے میں واقع ہے اس مسجد میں حفظ و ناظرۂ قرآن کا مکتب بھی قائم ہے۔ یہاں دو اساتذہ پڑھا رہے ہیں اورایک سو پچھتر طلبہ زیر تعلیم ہیں۔
دوسری مسجدجامعہ دارالعلوم کراچی کی محلّہ نانک واڑہ کی اس عمارت میں واقع ہے جس میں بنائے پاکستان کے بعدجون ۱۹۵۱ء میںجامعہ دارالعلوم قائم ہواتھا۔ اس عمارت میں شہری امور سے متعلق دفتر اور حفظ و ناظرہ کی متعدد درس گاہیں بھی قائم ہیں۔ یہاں سات اساتذۂ کرام کام کررہے ہیں اور تقریباً دوسوطلبہ پڑھ رہے ہیں۔
گلشن اقبال کراچی کی وسیع و دلکش مسجد ’’جامع مسجدبیت المکرم‘‘ بھی جامعہ دارالعلوم کراچی ہی کے زیر انتظام ہے۔ یہ مسجد اپنی وسعت اور طرز تعمیر کی بناء پر کراچی کی مساجد میں خصوصی حیثیت کی حامل ہے۔ مسجد اور متعلقات کا رقبہ تقریباً پانچ ایکڑ پر محیط ہے۔ جامع مسجد بیت المکرم کے احاطے میں حفظ و ناظرہ کی متعدد درسگاہیں بھی قائم ہیں۔ یہاں پانچ اساتذہ ہیں اور تقریباً دو سوطلبہ تعلیم حاصل کررہے ہیں۔علمی مذاکرات کے لئے ایک سیمینارہال بھی ہے، کچھ عرصہ سے یہاں درس نظامی کی کلاسیں بھی (رابعہ تک) شروع کردی گئی ہیں، اس کے ساتھ ساتھ دارالافتاء اور مرکز الاقتصاد الاسلامی کے دو شعبے بھی اپنی اپنی مفید خدمات انجام دے رہے ہیں۔

جدید جامع مسجد

معاونین ؟
واضح رہے کہ یہ مسجد ۹۹ فیصد مصارف کی حد تک پاکستان کے مخلص مسلمانوں کے تعاون سے تیارہوئی ہے ، اس کی تعمیر میں کسی ملکی یا غیر ملکی حکومت کی امداد شامل نہیں ہے ، پاکستان کے عوام نے اپنے خون پسینے کی کمائی میں سے جتنا بھی ہوسکا چندہ دیا ، ان میں زیادہ سے زیادہ رقمیں دینے والے اصحاب خیر بھی ہیں اور کم سے کم رقموں کے ذریعہ حصہ ڈالنے والے اللہ کے نیک بندے بھی ہیں ، اللہ تعالیٰ سب کے عطیات کو قبول فرمائے اور وہ تمام مسلمان جو کسی بھی لحاظ سے مسجد کی تعمیر کے لئے کوشاں رہے ، اللہ تعالیٰ رہتی دنیا تک اس مسجد کو ا ن کے لئے صدقۂ جاریہ اور ذخیرۂ آخرت بنائے۔آمین ۔